जर.....

हळदुलं कुंकू तुझ्या नावे लावलं असतं.
नवा पदर धरून हाती कोरभर लाजले असते.
भिजलेल्या श्रावणात
प्राजक्ताचा अब्दागीर
पाठवणी परतणी
सजलेली मंगळागौर
झिम्मा फुगडी सारे खेळ
खेळून दमले असते.
मिटले असते तुझ्या कुशीत
अंकुरात उमलले असते.
सजली वेल पाहिली असती,
चिमणा चिमणीचं धडकं घरट
भांड्याला भांडं लागून
चहाच्या पेल्यात वादळ हरतं.
जाऊन येऊन ऊन पाऊस
आपली छपरं पिकली असती.
दमा खोकला डायबेटीस
थोडी बायपासही सांभाळली असती.
खाल्ले असते चटके सोबत
पिकली पानं गळली असती.
कित्ती छान झालं असतं .......
........जर तुला आसवं कळली असती.

                                             -कौमुदी.