मी डोळे मिटून घेते मी घेते झाकून चेहरा
तुज कधीच नको कळाया ह्या भाव मनाचा गहिरा
पाऊल कोरले द्वारी मज कळले देखील नाही
मन कधी तुझ्या ओढीने ओलांडून गेले उंबरा
मन कुब्जा शबरी झाले तुज मागाया रामा
शपथ तुझ्या राधेची ना भाव मनी रे दुसरा
मी कसे तुला संवादू मज काही काही कळेना
मौनाला केवळ लाभे प्रितीचा चेहरा हसरा
मी दूर बसावे कोठे नि मुक्त तुला निरखावे
मी तुला भजावे चोरून ना पडो कुणाच्या नजरा
तुज काही नको कळाया मम डोळा येते पाणी
तू बंध तोडशी सारे जगण्यातून जाईल वारा
मी तुला कथावी गुपिते तू गुपिते म्हणुनी घ्यावी
तू मला कथावे काही ना अर्थ सुखाचा दुसरा
ना शब्द तुला समजावे मी मौन तुझे ऐकावे
संवादकौमुदी व्हावे नि अर्थ असावा गहिरा
-कौमुदी.
कोणत्याही टिप्पण्या नाहीत:
टिप्पणी पोस्ट करा