स्वगत

एकमेकांना चकवत मागं पुढं जात

तुझी माझी सोबत म्हणजे सुरुवात

मी... तुझ्या झाडामाडात, निळ्या पाण्यात

उमलत्या खळीत भरल्या डोळ्यांत

तुझी बेरीज माझ्या गणितात

तुझे कोन रेषासुद्धा माझ्या मापात

तू  म्हणजे डोह भीती बुडण्याची

नाही अंदाज खोलीचा ...

..... नेहमीच व्युहात, चक्रात कधी मृगजळातसुद्धा.

मी स्पष्ट सरळ ....आयत काटकोन चौकोन

मी साधसं गणित एक अधिक एक दोन

मी म्हणजे झाडं माड निर्विकार निर्भय

तुझी सकाळ दुपार सायंकाळ . . . रोज वेगळा सूर्योदय.

तू आणि मी आग आणि पाणी

गोंधळ आणि गाणी

विभाजनाची प्रक्रिया अन कंसाची जोडणी

तू आणि मी . . . सततचा संघर्ष

positive into negative is equal to neutral

हे तत्व साधसं . . .

तुझा माझा संघर्ष तरच प्रकाश

सोबत सुटलीच . . .  पुरता विनाश

जे होईल ते भोगू आपणच

दोन्ही तुल्यबळ विजयाचं काय?

संघर्षाचं काय? प्रश्न. . .प्रश्न . . . संघर्ष . . .

संघर्षाला उत्तर? . . .!

संघर्ष . . .

-कौमुदी.

माझी एकांकिका "संमुख कोन" यातील काही भाग.........