धावा

मी रंगले समाधीत
तू अंतरी उमलशी राजा
तुजपाशी सारी गुपिते
गुपितांचा गाजावाजा

तुजसाठी रोजच चाले
जगण्याचा आटापिटा
तुजपयी पांडूरंगा
माझ्या मर्तिकाच्या विटा

जळो जावो दु :ख सारे
सुखे अंतरी जळेन
थंड चंदन जळते
जरा इथे आकळेल

नको डोळ्यात आसवे
आसवांत ओघळशी
का रे मला तू जाळतो
का तू माझ्यात जळशी

जळो जावो मारो सारे
असे जळणे तळणे
पुरे झाले बरे आता
असे छळून छळणे

उभी काळसर्पयोगे
पुरे मरण पासंगा
प्राण जाई डोळ्यांतून
आता यावे पांडुरंगा
-कौमुदी(५ ऑग. २०११)